Disyembre 6, 2009
Patpatgek a kakabsat,
Ti kappia ti Apo adda kadakayo!
Mapadayawan ken maragsakanak iti pannakaibaonko nga agserbi kas kura paroko ditoy ilitayo a Marcos. Agyamanak iti Apo iti daytoy napateg a gundaway nga insagutna kaniak. Ammok a kadkadduaennatayo babaen ti grasiana iti panangsurottayo kas maysa a gimong iti dalan ti biag-pammati.
Daytoy ngarud ti umuna a daras nga agkakaddua ken agkaykaysatayo para iti Rambak ti Paskua ken Baro a Tawen. Namnamaek ti panagtitimpuyogtayo nga agsagana ken pannakipasettayo amin kadagiti nadumaduma nga aktibidades tapno nabaknang ti panagrambaktayo, ken agbalin daytoy a tiempo a pakadegdegan ken pagrang-ayan ti biag-pammatitayo kas parokia.
Iti daytoy a Paskua, mapabaro koma kadatay amin ti espiritu ti panagririnnanud ken panagsisinnakit, ta daytoy la ngarud ti anag daytoy a tiempo. Ti Dios, iti panangisakitna kadatayo a managbasol nga annakna, inranudna ni Apo Jesus tapno isalakannatayo. Daytoy koma ngarud met ti agbalin a pakakitaan ti kina-Catolikotayo: Iranudan ti tiempo, talento, pigsa ken kinabaknang ken isakittayo ti parokiatayo ken ti maysa ken maysa gapu ta agkakabsattayo.
Baro a tawen. Panangpabaro. Panangrugi manen. Irubbuattayo nga addaan iti nainget a panagtarigagay a pasantaken pay ti biag-parokia. Pannakapatanor kadagiti nadumaduma a ministries. Pannakapabaro ti Christian Formation Program. Pannakagutigot iti ad-adu pay a kameng ti parokia a makipaset kadagiti aramid-parokia. Pannakapapintas ti simbaantayo ken aglawlawna. Yantangay sagsagaantayo ti GOLDEN JUBILEE ti diocesistayo, dawatek ti alisto a pannakipartisiparyo kadagiti maisayangkatto a panagtitipon kadagiti barbarangay ken sitsitio nga idauloan ti Parish Jubilee Formation Team.
Naragsak a Paskua ken Napnoan Bendision a Baro a Tawen!
Toy agserserbi kadakayo,
Fr. Tom
No comments:
Post a Comment